ສະພາປະຊາຊົນຂັ້ນແຂວງ ມີ ສິດ ແລະ ໜ້າທີ່ ດ້ານການຕົກລົງບັນຫາສໍາຄັນພື້ນຖານຂອງທ້ອງຖິ່ນ ດັ່ງນີ້:
1. ດ້ານການເມືອງ ແລະ ການປົກຄອງ
1.1 ຮັບຟັງການລາຍງານ ແລະ ປະກອບຄໍາເຫັນ ໃສ່ວຽກງານປ້ອງກັນຊາດ-ປ້ອງກັນຄວາມ ສະຫງົບຂອງທ້ອງຖິ່ນ;
1.2 ພິຈາລະນາ, ຮັບຮອງເອົາ ການສ້າງຕັ້ງ ຫຼື ຍຸບເລີກ ເມືອງ, ເທດສະບານ, ນະຄອນ ແລະ ການກໍານົດເຂດແດນ ຂອງເມືອງ, ເທດສະບານ, ນະຄອນ, ແຜນຜັງລວມຕົວເມືອງຂອງນະຄອນ, ເທດສະບານ ແລະ ເມືອງ ຕາມການສະເຫນີຂອງ ເຈົ້າແຂວງ, ເຈົ້າຄອງນະຄອນຫຼວງ;
1.3 ພິຈາລະນາ, ຮັບຮອງເອົາ ແຜນການເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ;
1.4 ພິຈາລະນາ, ຮັບຮອງເອົາ ແຜນການເຄື່ອນໄຫວວຽກງານຂອງ ອົງການໄອຍະການປະຊາຊົນ, ສານປະຊາຊົນພາກ, ຂັ້ນແຂວງ ບ່ອນທີ່ອົງການໄອຍະການປະຊາຊົນ ແລະ ສານປະຊາຊົນນັ້ນຕັ້ງຢູ່;
1.5 ລົງມະຕິບໍ່ໄວ້ວາງໃຈບຸກຄະລາກອນທີ່ສະພາປະຊາຊົນຂັ້ນແຂວງ ເລືອກຕັ້ງ ຫຼື ຮັບຮອງ ເອົາການແຕ່ງຕັ້ງ ຕາມຄໍາສະເໜີຂອງຄະນະປະຈໍາສະພາປະຊາຊົນຂັ້ນແຂວງ ຫຼື ຢ່າງໜ້ອຍ ໜຶ່ງສ່ວນສີ່ ຂອງຈໍານວນສະມາຊິກສະພາປະຊາຊົນຂັ້ນແຂວງທັງໝົດ ເປັນຜູ້ສະເຫນີ.
2. ດ້ານເສດຖະກິດ-ສັງຄົມ
2.1 ພິຈາລະນາ, ຮັບຮອງເອົາ ແຜນຍຸດທະສາດ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງທ້ອງຖິ່ນ;
2.2 ພິຈາລະນາ, ຮັບຮອງເອົາ ແຜນການແບ່ງປັນງົບປະມານປະຈໍາປີ ຕາມການແບ່ງປັນຂອງລັດຖະບານ;
2.3 ພິຈາລະນາ, ຮັບຮອງເອົາ ແຜນພັດທະນາຊົນນະບົດ ແລະ ລົບລ້າງຄວາມທຸກຍາກ, ແຜນພັດທະນາ ຕົວເມືອງ, ເທດສະບານ, ນະຄອນ;
2.4 ພິຈາລະນາ, ຮັບຮອງເອົາ ແຜນຈັດສັນ, ການຫັນປ່ຽນປະເພດທີ່ດິນ ຈາກປະເພດໜຶ່ງ ໄປເປັນທີ່ດິນປະເພດອື່ນ ແລະ ການກໍານົດປະເມີນລາຄາທີ່ດິນຂອງທ້ອງຖິ່ນ ຕາມການສະເຫນີຂອງອົງການ ປົກຄອງຂັ້ນແຂວງ;
2.5 ພິຈາລະນາ, ຮັບຮອງເອົາ ແຜນການກໍ່ສ້າງພື້ນຖານໂຄງລ່າງປະຈໍາປີຂອງທ້ອງຖິ່ນ ແລະ ໂຄງການລະດັບທ້ອງຖິ່ນຮັບຜິດຊອບ ທີ່ມີຜົນກະທົບຕໍ່ສິ່ງແວດລ້ອມ ແລະ ສັງຄົມ;
2.6 ພິຈາລະນາ, ຮັບຮອງເອົາ ຜົນການກວດສອບງົບປະມານຂາດຕົວປະຈໍາປີ ຂອງອົງການກວດສອບປະຈໍາພາກ ທີ່ກ່ຽວຂ້ອງກັບຂັ້ນແຂວງນັ້ນ.
3. ດ້ານການຈັດຕັ້ງ ແລະ ບຸກຄະລາກອນ
3.1 ດ້ານການຈັດຕັ້ງ
3.1.1. ພິຈາລະນາ, ຮັບຮອງເອົາ ໂຄງປະກອບກົງຈັກການຈັດຕັ້ງຂອງສະພາປະຊາຊົນ ຂັ້ນແຂວງ, ການສ້າງຕັ້ງ, ຍຸບເລີກ, ໂຮມເຂົ້າ, ແຍກອອກ ຄະນະກໍາມະການ ແລະ ຄະນະເລຂາທິການຂອງສະ ພາປະຊາຊົນຂັ້ນແຂວງ ຕາມການສະເຫນີຂອງຄະນະປະຈໍາສະພາປະຊາຊົນຂັ້ນແຂວງ;
3.1.2. ພິຈາລະນາ, ຮັບຮອງເອົາ ການສ້າງຕັ້ງ, ຍຸບເລີກ, ໂຮມເຂົ້າ, ແຍກອອກ ພະແນກ, ອົງການລັດທຽບເທົ່າພະແນກຂັ້ນແຂວງ ຕາມການສະເຫນີຂອງ ເຈົ້າແຂວງ, ເຈົ້າຄອງນະຄອນຫຼວງ.
3.2. ດ້ານບຸກຄະລາກອນ
3.2.1. ເລືອກຕັ້ງ, ຍົກຍ້າຍ ຫຼື ປົດຕໍາແຫນ່ງ ປະທານ, ຮອງປະທານ ສະພາປະຊາຊົນຂັ້ນ ແຂວງ, ກໍາມະການຄະນະປະຈໍາສະພາປະຊາຊົນຂັ້ນແຂວງ ຕາມການສະເຫນີຂອງຄະນະປະຈໍາສະພາປະຊາຊົນ ຂັ້ນແຂວງ;
3.2.2. ເລືອກຕັ້ງ ຫຼື ປົດຕໍາແຫນ່ງ ເຈົ້າແຂວງ, ເຈົ້າຄອງນະຄອນຫຼວງ ຕາມການສະເຫນີ ຂອງຄະນະປະຈໍາສະພາປະຊາຊົນຂັ້ນແຂວງ;
3.2.3. ພິຈາລະນາ, ຮັບຮອງເອົາ ການແຕ່ງຕັ້ງ ຫຼື ປົດຕໍາແຫນ່ງ ຫົວຫນ້າອົງການໄອຍະ ການປະຊາຊົນ, ປະທານສານປະຊາຊົນ ພາກ, ແຂວງ, ນະຄອນຫຼວງ, ເຂດ ບ່ອນທີ່ອົງການໄອຍະການປະຊາ ຊົນ ແລະ ສານປະຊາຊົນ ນັ້ນຕັ້ງຢູ່ ຕາມການສະເຫນີຂອງຄະນະປະຈໍາສະພາປະຊາຊົນຂັ້ນແຂວງ;
3.2.4. ພິຈາລະນາ, ຮັບຮອງເອົາ ການແຕ່ງຕັ້ງ, ຍົກຍ້າຍ ຫຼື ປົດຕໍາແຫນ່ງ ປະທານ, ຮອງ ປະທານ ຄະນະກໍາມະການ ແລະ ເລຂາທິການຂອງສະພາປະຊາຊົນຂັ້ນແຂວງ ຕາມການສະເຫນີຂອງຄະນະປະ ຈໍາສະພາປະຊາຊົນຂັ້ນແຂວງ;
3.2.5. ພິຈາລະນາ, ຮັບຮອງເອົາ ການແຕ່ງຕັ້ງ, ຍົກຍ້າຍ ຫຼື ປົດຕໍາແຫນ່ງ ຮອງເຈົ້າແຂວງ, ຮອງເຈົ້າຄອງນະຄອນຫຼວງ, ຫົວຫນ້າພະແນກ, ຫົວຫນ້າອົງການລັດທຽບເທົ່າພະແນກຂັ້ນແຂວງ ຕາມການສະເຫນີ ຂອງເຈົ້າແຂວງ, ເຈົ້າຄອງນະຄອນຫຼວງ;
3.2.6. ມອບສິດ ໃຫ້ຄະນະປະຈໍາສະພາປະຊາຊົນຂັ້ນແຂວງ ພິຈາລະນາຮັບຮອງເອົາການ ສະເຫນີ ແຕ່ງຕັ້ງ, ຍົກຍ້າຍ ຫຼື ປົດຕໍາແຫນ່ງ ເປັນລາຍບຸກຄົນ ທີ່ດໍາລົງຕໍາແຫນ່ງໂດຍການຮັບຮອງເອົາຈາກສະພາ ປະຊາຊົນຂັ້ນແຂວງ ແລ້ວລາຍງານຕໍ່ກອງປະຊຸມສະພາປະຊາຊົນຂັ້ນແຂວງ; ພິຈາລະນາຮັບຮອງເອົາການສະ ເຫນີແຕ່ງຕັ້ງ, ຍົກຍ້າຍ ຫຼື ປົດຕໍາແຫນ່ງ ເປັນລາຍບຸກຄົນ ທີ່ດໍາລົງຕໍາແຫນ່ງ ໂດຍການເລືອກຕັ້ງຈາກສະພາ ປະຊາຊົນຂັ້ນແຂວງ ໃນກໍລະນີຈໍາເປັນ ແລະ ຮີບດ່ວນ ແລ້ວລາຍງານຕໍ່ກອງປະຊຸມສະພາປະຊາຊົນຂັ້ນແຂວງ.

ສະພາປະຊາຊົນຂັ້ນແຂວງ ມີ ສິດ ແລະ ໜ້າທີ່ ດ້ານການຕິດຕາມກວດກາ ດັ່ງນີ້:

1. ຕິດຕາມກວດກາ ບັນດາອົງການລັດຂັ້ນທ້ອງຖິ່ນຂອງຕົນ ໃນການຈັດຕັ້ງປະຕິບັດ ລັດຖະທໍາມະນູນ, ກົດຫມາຍ, ມະຕິຂອງກອງປະຊຸມສະພາແຫ່ງຊາດ, ມະຕິຂອງຄະນະປະຈໍາສະພາ ແຫ່ງຊາດ, ມະຕິຂອງກອງປະຊຸມສະພາປະຊາຊົນຂັ້ນແຂວງ, ມະຕິ ແລະ ຂໍ້ຕົກລົງ ຂອງຄະນະປະຈໍາ ສະພາປະຊາຊົນຂັ້ນແຂວງ;
2. ຕິດຕາມກວດກາ ການອອກ ຂໍ້ຕົກລົງ, ຄໍາສັ່ງ, ຄໍາແນະນໍາ ແລະ ການຈັດຕັ້ງປະຕິບັດ ວຽກງານ ຂອງອົງການປົກຄອງທ້ອງຖິ່ນຕົນ;
3. ຕິດຕາມກວດກາ ການຈັດຕັ້ງປະຕິບັດວຽກງານທາງ ດ້ານການເມືອງ ແລະ ການປົກ ຄອງ, ດ້ານເສດຖະກິດ-ສັງຄົມ, ດ້ານການຈັດຕັ້ງ ແລະ ບຸກຄະລາກອນ ທີ່ສະພາປະຊາຊົນຂັ້ນແຂວງຮັບຮອງເອົາ;
4. ຕິດຕາມກວດກາ ລາຍຮັບ ລາຍຈ່າຍງົບປະມານ ຂັ້ນແຂວງ ແລະ ຂັ້ນເມືອງ.